ຫົວໜ້າຄອຂລົງເຄື່ອນໄຫວເຮັດວຽກຢູ່ເມືອງດາກຈຶງ

ລາຍລະອຽດ

ສ້າງຂື້ນເມື່ອ ວັນຈັນ, 26 ສິງຫາ 2019 03:45

ຂຽນໂດຍ Darling

      ໂດຍຕອບສະໜອງຕາມຄໍາເຊີນຂອງ ຄະນະໂຄສະນາອົບຮົມເມືອງດາກຈຶງ, ໃນວັນທີ 16/8/2019 ຜ່ານມານີ້, ທ່ານ ດາວວີ ສວຍທະລັງສີ ກໍາມະການພັກແຂວງ ຫົວໜ້າ ຄະນະໂຄສະນາອົບຮົມແຂວງ ໄດ້ເດີນທາງລົງໄປເຄື່ອນໄຫວ ເຮັດວຽກຢູ່ເມືອງດັ່ງກ່າວ, ກົງກັບໄລຍະເວລາທີ່ເມືອງ ພວມດໍາເນີນການໂຄສະນາ - ປາຖະກະຖາຫວນຄືນ ມູນເຊື້ອ ວັນສໍາຄັນ ຂອງຊາດ ຂອງພັກ

ພາຍໃນເດືອນສິງຫາ ພິທີໄດ້ຈັດຂຶ້ນທີ່ສະໂມສອນເມືອງ; ມີຄະນະພັກເມືອງ, ພະນັກງານນໍາພາ-ຫຼັກແຫຼ່ງທຸກຂະແໜງການ ອ້ອມຂ້າງເມືອງເຂົ້າຮ່ວມ. ໃນພິທີອັນມີຄວາມ ໝາຍສໍາຄັນນີ້ ທ່ານຫົວໜ້າ ຄະນະໂຄສະນາອົບຮົມແຂວງ ຍັງໄດ້ຮັບກຽດໃຫ້ ເປັນຜູ້ປາຖະຖາ ວັນຢຶດອໍານາດທົ່ວປະເທດ 23 ສິງຫາ ຄົບຮອບ 74 ປີ ແລະ 44 ປີ (23/8/1945 ແລະ 23/8/1975-23/8/2019) ເຊິ່ງທ່ານໄດ້ຍົກໃຫ້ເຫັນເຖິງປະຫວັດຄວາມເປັນມາ ຂອງການຢຶດອໍານາດເທື່ອທີໜຶ່ງ ໃນເດືອນສິງຫາ ປີ 1945 ແລະ ເທື່ອທີ ສອງ ໃນວັນທີ 23 ສິງຫາ ປີ 1975 ນັ້ນສຸດທີ່ມີຄວາມໝາຍສໍາຄັນຍິ່ງສໍາລັບພວກເຮົາເພາະວ່າ: ມັນແມ່ນໝາກຜົນແຫ່ງການ ຕໍ່ສູ້ປະຕິວັດ ອັນຍືດເຍື້ອຍາວນານຂອງກອງທັບ ແລະ ປະຊາຊົນ ລາວຜູ້ຮັກຊາດ ພາຍໃຕ້ການຊີ້ນໍາ-ນໍາພາອັນປີຊາສາມາດສະ ຫຼາດສ່ອງໃສຂອງພັກປະຊາຊົນປະຕິວັດລາວ ຈົນສາມາດຍາດໄດ້ໄຊຊະນະຢ່າງສົມບູນ ແລະ ສະຖາປະນາ ສາທາ ລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975; ໃນຕອນທ້າຍທ່ານໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງສືບຕໍ່ເສີມຂະຫຍາຍມູນເຊື້ອ ອັນສະຫງ່າລາສີຂອງບັນພະບູລຸດ, ຂອງຊາດເຂົ້າໃນການປະຕິບັດໜ້າທີ່ວຽກງານ ທີ່ຕົນຮັບ ຜິດຊອບໃຫ້ເກີດມີໝາກຜົນຕົວຈິງ. ທີ່ສໍາຄັນແມ່ນທ່ານໄດ້ເນັ້ນໜັກ ໃຫ້ເລຂາຄະ ນະພັກ, ຫົວໜ້າອົງການຈັດຕັ້ງ ແຕ່ລະ ບ່ອນຕ້ອງເຊີດຊູຄວາມເປັນແບບຢ່າງນໍາໜ້າໃຫ້ແກ່ມະຫາຊົນ, ເອົາໃຈໃສ່ໂຄສະນາສຶກສາອົບຮົມການເມືອງນໍາພາ-ແນວຄິດ ໃຫ້ສະ ມາຊິກຂອງຕົນ ໃຫ້ເລິກເຊິ່ງເຖິງຖອງກວ່າເກົ່າ ຕາມທິດເຮັດກ່ອນ, ເຮັດໄປພ້ອມກັບ, ເຮັດຕາມຫຼັງ ແລະ ສອດຫ້ອຍ ເຂົ້າ ທຸກຂົງເຂດຊີວິດສັງຄົມ.

      ຫຼັງຈາກນັ້ນ, ສະຫາຍ ເພັງນາ ຈັນທະພອນ ຮອງເລຂາພັກເມືອງ ຜູ້ຊີ້ນໍາຂົງເຂດພັກ-ພະນັກງານຂັ້ນເມືອງ ກໍໄດ້ໃຫ້ກຽດ ປາຖະກະຖາ ວັນສ້າງຕັ້ງອາຊຽນ ຄົບຮອບ 52 ປີ ແລະ ສະຫາຍ ພົມວຽງໄຊ  ເກດສະໜາຄໍາ ກໍາມະການພັກເມືອງ ຫົວໜ້າ ຫ້ອງການຍຸຕິທໍາເມືອງດາກຈຶງ ກໍໄດ້ໃຫ້ກຽດປາຖະກະຖາ ວັນປະກາດໃຊ້ລັດຖະທໍາມະນູນແຫ່ງ ສປປ ລາວ ຄົບຮອບ 28 ປີ; ກອງປະຊຸມໄດ້ດໍາເນີນມາຈົນຮອດເວລາ 11:00 ກໍໄດ້ສິ້ນສຸດລົງດ້ວຍໝາກຜົນອັນຈົບງາມ ຕາມຄາດໝາຍທີ່ວາງໃວ້ທຸກປະການ.

• < ຕໍ່ໄປ
• ຕໍ່ໄປ >