ເຊກອງຫວນຄືນມູນເຊື້ອວັນປະກາດເອກະລາດ 12 ຕຸລາ ຄົບຮອບ 74 ປີ

ສ້າງຂື້ນເມື່ອ ວັນສຸກ, 25 ຕຸລາ 2019 03:18
ຂຽນໂດຍ Darling

       ຕອນເຊົ້າວັນທີ 10/10/2019 ຄະນະໂຄສະນາອົບຮົມແຂວງເຊກອງ ໄດ້ຈັດພິທີປາຖະກະຖາ ຫວນຄືນມູນເຊື້ອ ວັນປະກາດ ເອກະລາດ 12ຕຸລາ ຄົບຮອບ 74 ປີ (12/10/1945-12/10/2019) ຂຶ້ນທີ່ສະໂມສອນ ໃຫຍ່ຂອງແຂວງ; ໃຫ້ກຽດປາຖະກະຖາໂດຍ ທ່ານ ດາວວີ ສວຍທະລັງສີ ກໍາມະການພັກແຂວງຫົວໜ້າຄະນະໂຄສະນາອົບຮົມແຂວງ, ມີກໍາມະການພັກແຂວງ, ຄະນະພັກຮາກ ຖານ, ພະນັກງານນໍາພາຫຼັກແຫຼ່ງ ທຸກຂະແໜງການອ້ອມຂ້າງແຂວງ ເຂົ້າຮ່ວມຮັບຟັງຢ່າງພ້ອມພຽງ.

   ໃນພິທີທ່ານ ດາວວີ ສວຍທະລັງສີ ໄດ້ຍົກໃຫ້ເຫັນເຫດການ ສໍາຄັນຢູ່ພາຍນອກ ແລະ ພາຍໃນປະເທດທີ່ເປັນເງື່ອນໄຂໃຫ້ ແກ່ການປະກາດເອກະລາດ ໃນວັນທີ 12 ຕຸລາ ປີ 1945 ເປັນເຫດການທີ່ມີຄວາມໝາຍທາງປະຫວັດສາດ ຂອງຊາດລາວເຮົາ, ເປັນການປະກາດໃຫ້ໂລກຮູ້ວ່າ "ຊາດລາວ-ແຜ່ນດິນລາວ ຕ້ອງແມ່ນຄົນລາວເປັນເຈົ້າຂອງ, ຄົນ ລາວກໍເປັນຄົນທີ່ມີກຽດສັກສີ, ຢາກມີອິດສະຫຼະພາບ ເປັນເຈົ້າຕົນເອງ ຢາກມີຄວາມຢູ່ດີ ກິນດີ ແລະ ຈະເລີນກ້າວໜ້າ ຄືກັນກັບຄົນຊາດອື່ນ"; ສະນັ້ນ ເພື່ອສືບຕໍ່ເສີມຂະ ຫຍາຍມູນເຊື້ອ ອັນສະຫງ່າລາສີ ຂອງວັນທີ 12 ຕຸລາ ປີ1945 ໃຫ້ເຂົ້າສູ່ຊີວິດຕົວຈິງ, ທ່ານຫົວໜ້າຄະນະໂຄ ສະນາອົບຮົມແຂວງ ໄດ້ຮຽກຮ້ອງໃຫ້ ຄະນະພັກ-ຄະນະນໍາທຸກຂັ້ນ ຕ້ອງເພີ່ມທະວີການໂຄ ສະນາ ສຶກສາອົບຮົມການເມືອງ -ແນວຄິດ ຂອງພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ທີ່ຢູ່ໃນຄວາມຮັບຜິດຊອບຂອງຕົນ ໃຫ້ເຊີດຊູ ນໍ້າໃຈຮັກຊາດຢ່າງດູດດື່ມ, ຕະລຸມບອນເຂົ້າໃສ່ ການປະຕິບັດ ມະຕິ X ຂອງພັກ ແລະ ມະຕິ IX ຂອງອົງຄະນະພັກແຂວງ ໃນໄລຍະທ້າຍສະໄໝ ໃຫ້ບັນລຸຜົນສໍາເລັດຕາມຄາດ ໝາຍ ຫຼື ມີບາງດ້ານ ລື່ນຄາດໝາຍກໍຍິ່ງດີ.