ບັ້ນອົບຄວາມຮູ້ດ້ານການເມືອງ-ການປົກຄອງ ແລະ ການສ້າງບ້ານພັດທະນາ ຢູ່ເມືອງດາກຈຶງ

ລາຍລະອຽດ

ສ້າງຂື້ນເມື່ອ ວັນພະຫັດ, 21 ມັງກອນ 2021 04:02

ຂຽນໂດຍ Darling

ໃນລະຫວ່າງວັນທີ 28-29/12/2020 ຜ່ານມາ, ທີ່ໂຮງຮຽນ ມ. ຕົ້ນ ຕາຕື ຄະນະໂຄສະນາອົບຮົມແຂວງ ຮ່ວມກັບ ກົມອົບຮົມ ຄະນະໂຄສະນາອົບຮົມສູນກາງພັກ ແລະ ຫ້ອງການໂຄສະນາອົບຮົມເມືອງດາກຈຶງ ໄດ້ເປີດບັ້ນອົບຮົມຄວາມຮູ້ດ້ານການເມືອງ-ການປົກຄອງ ແລະ ການສ້າງບ້ານພັດທະນາ ໃຫ້ເລຂາໜ່ວຍພັກ-ນາຍບ້ານ, ແພດໝໍປະຈໍາສຸກສາລາ, ຄູອາຈານ, ເລຂາຊາວໜຸ່ມ-ປະທານແມ່ຍິງ 3 ບ້ານ ທີ່ຂຶ້ນກັບກຸ່ມຕາຕື ຄື: ບ້ານດາກມິ, ດາກບຣູ ແລະ ດາກເລ  ມີຜູ້ເຂົ້າຮ່ວມທັງໝົດ 40 ຄົນ, ຍິງ 10 ຄົນ; ໂດຍການເປັນກຽດເຂົ້າຮ່ວມກ່າວເປີດ, ມອບໃບຢັ້ງຢືນ ແລະ ກ່າວປິດພິທີ ຂອງທ່ານ ເພັງນາ ຈັນທະພອນ ຮອງເລຂາພັກເມືອງ ປະທານຄະນະກວດກາພັກເມືອງ.

ສໍາລັບເນື້ອໃນທີ່ນໍາໃຊ້ເຂົ້າໃນການອົບຮົມເທື່ອນີ້ ມີ 5 ບົດຄື:

ບົດທີ 1 ຊາດລາວ, ຄົນລາວ ແລະ ມູນເຊື້ອອັນສະຫງ່າລາສີ ຂອງປະຊາຊົນລາວ ສະເໜີໂດຍ: ທ່ານ ເພັງນາ ຈັນທະພອນ ຮອງເລຂາພັກເມືອງ ປະທານຄະນະກວດກາພັກເມືອງ.

ບົດທີ 2 ລະບົບການເມືອງ ແລະ ການປົກຄອງ ໃນລະບອບປະຊາຊທິປະໄຕປະຊາຊົນ ສະເໜີໂດຍ: ທ່ານແສງຄໍາ ສຸວັນແດງ ຮອງຫົວໜ້າຄະນະໂຄສະນາອົບຮົມແຂວງ.

ບົດທີ 3 ຍົກສູງຄວາມສາມາດນໍາພາ ຂອງໜ່ວຍພັກບ້ານ, ສ້າງໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ

ບົດທີ 4 ການສ້າງບ້ານເປັນຫົວໜ່ວຍພັດທະນາ (ບົດທີ 3-4 ສະເໜີໂດຍ: ທ່ານ ນ. ສຸກສະຫວັນ ອິນຄະວິໄລ ຮອງຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ).

ບົດທີ 5 ການແກ້ໄຂຄວາມທຸກຍາກ ແລະ ການຜະລິດເປັນສິນຄ້າ ສະເໜີໂດຍ: ທ່ານ ວຸດສໍາພັນ ນິນໂພໄຊ  ຮອງຫົວໜ້າຫ້ອງການໂຄສະນາອົບຮົມເມືອງດາກຈຶງ.

ຈຸດປະສົງ ກໍເພື່ອຍົກລະດັບຄວາມຮູ້ ດ້ານການເມືອງ-ການປົກຄອງ ແລະ ການສ້າງບ້ານພັດທະນາ ສໍາລັບຜູ້ທີ່ນໍາພາ-ຄຸ້ມຄອງຢູ່ຮາກຖານ, ໂດຍສະເພາະແມ່ນ ເລຂາໜ່ວຍພັກ, ນາຍບ້ານ ໃຫ້ກາຍເປັນຜູ້ນໍາທີ່ເຂັ້ມແຂງ, ເປັນນັກພັດທະນາກອນທີ່ຫ້າວຫັນ, ອັນສໍາຄັນແມ່ນ ເພື່ອສຶກສາອົບຮົມປະຊາຊົນພາຍໃນບ້ານ ໃຫ້ຕື່ນຕົວຮັບຮູ້ຢ່າງຈະແຈ້ງວ່າ ການແກ້ໄຂຄວາມທຸກຍາກ ແມ່ນເລີ່ມຈາກຄອບຄົວ ການສ້າງຄອບຄົວ ໃຫ້ກິນອິ່ມ-ນຸ່ງອຸ່ນ, ກິນແຊບ ນຸ່ງງາມນັ້ນ ຕ້ອງແມ່ນປະຊາຊົນເອງ ເປັນຜູ້ສ້າງມັນຂຶ້ນ ໂດຍມີອົງການຈັດຕັ້ງທີ່ກ່ຽວຂ້ອງ ຂອງພັກ-ລັດ ເປັນຜູ້ສ້າງເງື່ອນໄຂອໍານວຍໃຫ້; ຫາກບໍ່ແມ່ນວ່າ ຄອຍຖ້າຮັບເອົາແຕ່ການຊ່ວຍເຫຼືອ ຈາກພັກ-ລັດ ພຽງຢ່າງດຽວ.

• < ຕໍ່ໄປ
• ຕໍ່ໄປ >