ຄະນະໂຄສະນາອົບຮົມແຂວງເປີດກອງປະຊຸມປະເມີນແຜນກໍານົດພະນັກງານນໍາພາ-ຄຸ້ມຄອງ ປະຈໍາປີ 2022

ລາຍລະອຽດ

ສ້າງຂື້ນເມື່ອ ວັນອັງຄານ, 24 ມັງກອນ 2023 09:11

ຂຽນໂດຍ Darling

         ຄະນະໂຄສະນາອົບຮົມແຂວງ ໄດ້ເປີດກອງປະຊຸມປະເມີນແຜນກຳນົດພະນັກງານນຳພາ-ຄຸ້ມຄອງ ປະຈໍາປີ 2022 ໃນຄັ້ງວັນທີ 24 ມັງກອນ 2023 ພາຍໃຕ້ການເປັນປະທານຂອງ ທ່ານ ນາງ ສີສະຫງ່າ ແກ້ວດວງດີ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ມີຄະນະໂຄສະນາອົບຮົມແຂວງ, ຄະນະກໍາມະການທີ່ມາຈາກ ພະແນກພາຍໃນແຂວງ, ຄະນະຈັກຕັ້ງແຂວງ, ຄະນະກວດກາພັກ-ລັດແຂວງ ພ້ອມດ້ວຍພະນັກງານສະມາ ຊິກພາຍໃນຄະນະໂຄສະນາອົບຮົມແຂວງ ເຂົ້າຮ່ວມ ຈໍານວນ 26 ທ່ານ, ຍິງ 19 ທ່ານ.

         ໃນວາລະກອງປະຊຸມ ທ່ານ ນາງ ຈັນສະໄໝ ວິໄລສານ ຮອງຫົວໜ້າຄະນະໂຄສະນາອົບຮົມແຂວງ ໄດ້ຜ່ານ ບົດສະຫຼຸບຕີລາຄາວຽກງານປະເມີນແຜນກໍານົດພະນັກງານນໍາພາ-ຄຸ້ມຄອງ ຂອງຄະນະໂຄສະນາອົບຮົມແຂວງ,​ ທ່ານ ນາງ ເພັດມະນີ ທໍາມະສອນ ຮອງຫົວໜ້າຂະແໜງຄຸ້ມຄອງພະນັກງານ ຂອງ ຄະນະຈັດຕັ້ງແຂວງ ໄດ້ຜ່ານ ແຈ້ງການແນະນໍາເລກທີ 91/ຄຈຂ, ລົງວັນທີ 20 ກໍລະກົດ 2022 ວ່າດ້ວຍ ການກະກຽມປະເມີນຄືນ ການສ້າງແຜນກໍານົດພະນັກງານນຳພາ-ຄຸ້ມຄອງ ແຕ່ລະຂັ້ນ ຂອງແຕ່ລະພະແນກການອ້ອມຂ້າງແຂວງ ແລະ 04 ຕົວເມືອງ ປະຈໍາປີ 2022 ແລະ ມະຕິກົມການເມືອງສູນກາງພັກ ສະບັບເລກທີ 30/ກມສພ,​ລົງວັນທີ 03 ມັງກອນ 2018 ວ່າດ້ວຍມາດຖານ ພະນັກງານນໍາພາຄຸ້ມຄອງ .

           ກ່ອນຈະມີການປ່ອນບັດລົງຄະແນນສຽງ ປະທານກອງປະຊຸມ ໄດ້ມີຄໍາເຫັັນໂອ້ລົມ ແລະ ເນັ້ນໜັກໃຫ້ຮັບຮູ້ເຂົ້າໃຈກ່ຽວກັບຫຼັກການໃນການໃຫ້ຄະນະແນນ ເຊິ່ງໄດ້ແນະນໍາໃຫ້ແຕ່ລະທ່ານຄົ້ນຄ້ວາໄຕ່ຕອງດ້ວຍຕົນເອງຢ່າງລະອຽດຖີ່ຖ້ວນພາວະວິໄສ ເພື່ອໃຫ້ການສ້າງແຜນກໍານົດພະນັກງານນໍາພາ-ຄຸ້ມຄອງໃນຄັ້ງນີ້ ມີຄຸນນະພາບ, ສ້າງໃຫ້ໄດ້ພະນັກງານສືບທອດປ່ຽນແທນຢ່າງຕໍ່ເນື່ອງ.

• < ຕໍ່ໄປ
• ຕໍ່ໄປ >