ແຂວງເຊກອງໄດ້ເປີດກອງປະຊຸມ ວຽກງານການເມືອງ-ແນວຄິດ ເພື່ອເພີ່ມທະວີການນໍາພາຂອງພັກ ສ້າງການຫັນປ່ຽນ ວຽກງານການເມືອງ-ແນວຄິດໄປສູ່ຄຸນະພາບໃໝ່ຢ່າງແຂງແຮງ

ລາຍລະອຽດ

ສ້າງຂື້ນເມື່ອ ວັນຈັນ, 27 ມີນາ 2023 02:39

ຂຽນໂດຍ Darling

        ກອງປະຊຸມ ວຽກງານການເມືອງ-ແນວຄິດ ທົ່ວແຂວງເຊກອງ ໄດ້ໄຂຂື້ນຢ່າງເປັນທາງການ ໃນຕອນເຊົ້າຂອງ ວັນທີ 23 ມີນາ 2023. ພາຍໃຕ້ການເຂົ້າຮ່ວມເປັນປະທານ ຂອງ ສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ ເລຂາຄະນະບໍລິຫານງານພັກແຂວງ, ສະຫາຍ ນາງ ຈັນຫອມ ມະຫາໄຊ ຮອງເລຂາພັກແຂວງ ຜູ້ຊີ້ນຳການເມືອງ-ແນວຄິດ, ວຽກພັກ-ພະນັກງານ, ມີຄະນະປະຈຳພັກແຂວງ, ກໍາມະການພັກແຂວງ, ພ້ອມດ້ວຍເລຂາພັກເມືອງ, ບັນດາຫົວໜ້າ ແລະ ຮອງ ພະແນກການອ້ອມຂ້າງແຂວງ ແລະ ອົງການທຽບເທົ່າເຂົ້າຮ່ວມທັງໝົດ 151 ສະຫາຍ, ຍິງ 21 ສະຫາຍ.

         ໃນກອງປະຊຸມ ສະຫາຍ ນາງ ສີສະຫງ່າ ແກ້ວດວງດີ ກໍາມະການພັກແຂວງ ໄດ້ຜ່ານບົດສະຫຼຸບຕີລາຄາສະພາບການຈັດຕັ້ງປະຕິບັດ ວຽກງານການເມືອງ-ແນວຄິດ ໄລຍະແຕ່ປີ 2016-2022 ແລະ ທິດທາງຮອດ ປີ 2025. ພ້ອມນັ້ນ ສະຫາຍ ນາງຈັນຫອມ ມະຫາໄຊ ຮອງເລຂາພັກແຂວງ ຜູ້ຊີ້ນຳການເມືອງ-ແນວຄິດ, ວຽກພັກ-ພະນັກງານ ໄດ້ເຊື່ອມຊຶມມະຕິກອງປະຊຸມວຽກງານການເມືອງ-ແນວຄິດ ທົ່ວປະເທດຄັ້ງທີ V ແລະ ມະຕິວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່  ເຂົ້າໃນຊີວິດສັງຄົມຕົວຈິງ. ໃນວາລະກອງປະຊຸມ ພະແນກການອ້ອມຂ້າງແຂວງໄດ້ ແລະ ການນໍາຂັ້ນເມືອງ 4 ຕົວເມືອງ ໄດ້ລາຍງານການຈັດຕັ້ງປະຕິບັດວຽກງານການເມືອງ-ແນວຄິດທີ່ຢູ່ໃນຄວາມຮັບຜິດຊອບຂອງຕົນ.

        ໃນກອງປະຊຸມຄັ້ງນີ້ຍັງໄດ້ຮັບຟັງການມີຄຳເຫັນຊີ້ນຳຈາກ ສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ ເຊິ່ງໄດ້ຍົກໃຫ້ເຫັນ ຄວາມໝາຍ ຄວາມສຳຄັນ ໃນການຕີລາຄາ ການນຳພາ-ຊີ້ນຳວຽກງານການເມືອງ-ແນວຄິດຂອງຄະນະນຳ ແຕ່ລະຂັ້ນ ໂດຍສະເພາະການຜັນຂະຫຍາຍມະຕິ XI ຂອງພັກ ໃຫ້ເຂົ້າສູ່ຊີວິດ-ສັງຄົມຕົວຈິງ ແລະ ສາມາດສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ, ເພື່ອສຶບຕໍ່ຜັນຂະຫຍາຍວຽກງານການເມືອງ-ແນວຄິດໃຫ້ຄະນະພັກຂັ້ນຕ່າງໆໃຫ້ມີຄວາມ ເຂົ້າໃຈຢ່າງ ເລິກເຊິງ.

• < ຕໍ່ໄປ
• ຕໍ່ໄປ >