ຄະນະໂຄສະນາອົບຮົມແຂວງ ເປີດກອງປະຊຸມກາງສະໄໝ ຂອງໜ່ວຍພັກຮາກຖານຄະນະໂຄສະນາອົບຮົມແຂວງ ຄັ້ງທີ V

ລາຍລະອຽດ

ສ້າງຂື້ນເມື່ອ ວັນພຸດ, 24 ພຶດສະພາ 2023 04:01

ຂຽນໂດຍ Darling

        ກອງປະຊຸມກາງສະໄໝ ຂອງໜ່ວຍພັກຮາກຖານຄະນະໂຄສະນາອົບຮົມແຂວງ ຄັ້ງທີ V ໄດ້ໄຂຂຶ້ນໃນຕອນເຊົ້າ ຂອງວັນທີ 11 ພຶດສະພາ 2023 ພາຍໃຕ້ການເຂົ້າຮ່ວມເປັນປະທານຂອງ ສະຫາຍ ນາງ ຈັນຫອມ ມະຫາໄຊ ຮອງເລຂາພັກແຂວງ ຜູ້ຊີ້ນຳການເມືອງ-ແນວຄິດ, ວຽກພັກ-ພະນັກງານ, ສະຫາຍ ປອ ສົມນິດ ສິລິບຸນລ້ຽງ ຄະນະປະຈຳພັກແຂວງ ປະທານກວດກາພັກ ແຂວງ, ສະຫາຍ ນາງ ສີສະຫງ່າ ແກ້ວດວງດີ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ມີຄະນະຮັບຜິດຊອບຊຸກຍູ້ຕິດຕາມກອງປະຊຸມກາງສະໄໝຂັ້ນແຂວງ, ມີຄະນະພັກຮາກຖານ, ຄະນະໜ່ວຍພັກຂົງເຂດພັກ-ພະນັກງານ ພ້ອມດ້ວຍສະມາຊິກພັກຄະນະໂຄສະນາອົບຮົມແຂວງ ເຂົ້າຮ່ວມທັງ   ໝົດ 30 ສະຫາຍ, ຍິງ 19 ສະຫາຍ.

     ໃນກອງປະຊຸມ ສະຫາຍ ບຸນທັນ ແກ້ວມະນີໄລ ຄະນະໜ່ວຍພັກຄະນະໂຄສະນາແຂວງ ໄດ້ຜ່ານຄໍາສັ່ງເພີ່ມເຕີມ ຂອງຄະນະປະຈຳພັກແຂວງ ສະບັບເລກທີ 04/ຄປພຂ, ລົງວັນທີ 16/2/2023 ວ່າດ້ວຍການດຳເນີນກອງປະຊຸມກາງສະໄໝຂອງຄະນະພັກ ແຕ່ລະຂັ້ນ ແລະ ຜ່ານຄຳແນະນຳຂອງຄະນະຈັດຕັ້ງແຂວງ ສະບັັບເລກທີ 19/ຄຈຂ, ລົງວັນທີ 11/2/2023 ວ່າດ້ວຍການຈັດຕັ້ງປະຕິບັດຄໍາສັ່ງເພີ່ມເຕີມ ຂອງຄະນະປະຈໍາພັກແຂວງ ເລກທີ 04/ຄປພຂ. ພ້ອມກັນນັ້ນ ສະຫາຍ ນາງ ສີສະຫງ່າ ແກ້ວດວງດີ ເລຂາໜ່ວຍພັກຮາກຖານຄະນະໂຄສະນາອົບຮົມແຂວງ ໄດ້ຜ່ານມາດຕະຖານຂອງພະນັກງານນຳພາ-ຄຸ້ມຄອງ, 11 ຂໍ້ຫ້າມ ຂອງສະມາຊິກພັກ ແລະ ພາລະບົດບາດສິດ ແລະ ໜ້າທີ່ຂອງຄະນະພັກແຕ່ລະຂັ້ນ ທີ່ໄດ້ລະບຸໄວ້ໃນກົດລະບຽບພັກປະຊາຊົນປະຕິວັດລາວ ສະໄໝທີ  XI.

     ໃນກອງປະຊຸມຄັ້ງນີ້ຍັງໄດ້ດຳເນີນການປ່ອນບັດທາບທາມເພື່ອຢັ່ງຫາງສຽງຄວາມໄວ້ວາງໃຈຂອງຄະນະພັກ ຈາກນັ້ນຄະນະໜ່ວຍພັກຄະນະໂຄສະນາອົບຮົມແຂວງ ໄດ້ຜ່ານບົດສະຫຼຸບລາຍງານການຈັດຕັ້ງປະຕິບັດມະຕິກອງປະຊຸມສະ ມາຊິກພັກກາງສະໄໝຂອງຄະນະພັກ ແລະ ທິດທາງແຜນການທ້າຍສະໄໝ, ຜ່ານແຜນດຳເນີນງານທ້າຍສະໄໝຂອງ     ໜ່ວຍ,  ຜ່ານບົດສຳຫຼວດການນຳພາ-ຊີ້ນຳລວມຂອງຄະນະໜ່ວຍພັກໃນໄລຍະກາງສະໄໝຜ່ານມາ ແລະ ວິທີການແກ້ໄຂໃນຕໍ່ໜ້າ, ພ້ອມທັງຜ່ານບົດສຳຫຼວດບຸກຄົນພາຍໃນຄະນະໜ່ວຍພັກ, ຊີ້ແຈ້ງຕໍ່ຄຳຄິດ ຄຳເຫັນ ຄຳຕຳນິສົ່ງຂ່າວ ຈາກສະມາຊິກພັກ, ຕໍ່ການນຳພາລວມບຸກຄົນໃນຄະນະໜ່ວຍພັກ ແລະ ເພື່ອເປັນການຍ້ອງຍໍ ຜົນງານຂອງກົມກອງ ແລະ ພະນັກງານລັກຖະກອນ ໃນໄລຍະ 5 ປີຜ່ານມາ ໃນວາລະກອງປະຊຸມຍັງໄດ້ ປະດັບຫຼຽນໄຊແຮງງານຊັ້ນ II, ຊັ້ນ III,  ມອບໃບຍ້ອງຍໍ້ລັດຖະບານ ແລະ ໃບຍ້ອງຍໍ້ເຈົ້າແຂວງ ໃຫ້ແກ່ກົມກອງລວມໝູ່ ແລະ ພະນັກງານ-ລັດຖະກອນ ຄະນະໂຄສະນາອົບຮົມແຂວງຕື່ມອີກ.

    ໃນໂອກາດດັ່ງກ່າວ ສະຫາຍ ນາງ ຈັນຫອມ ມະຫາໄຊ ຮອງເລຂາພັກແຂວງ ໄດ້ມີຄຳເຫັນໂອ້ລົມຕໍ່ກອງປະຊຸມຄັ້ງນີ້ແມ່ນໄດ້ປະຕິບັດຕາມກົດລະບຽບຂອງພັກ, ເຊິ່ງຄະນະໜ່ວຍພັກໄດ້ເປັນເຈົ້າການກະກຽມ ຕາມທິດຊີ້ນຳຂອງຄະນະປະຈຳພັກແຂວງ, ເນັ້ນໜັກໃຫ້ໜ່ວຍພັກໂຄສະນາອົບຮົມແຂວງ ເພີ່ມທະວີຄວາມເປັນເອກະພາບ ເຫັນໄດ້ຄວາມສຳຄັນຂອງວຽກງານການເມືອງ-ແນວຄິດເປັນຕົວ ເຊີດຊູຄວາມສາມັກຄືເປັນປຶກແຜ່ນ, ເອົາໃຈໃສ່ເຊື່ອມຊຶມນິຕິກຳ ແລະ ບັນ ດາມະຕິຂອງພັກດ້ວຍຫຼາຍຮູບຫຼາຍສີ, ກວດຄືນມະຕິຄຳສັ່ງທີ່ຕິດພັນກັບວຽກງານ ເພື່ອນຳໄປຈັດຕັ້ງປະຕິບັດໃຫ້ສອດສຄ່ອງ ກັບວຽກງານຂອງຕົນ, ເອົາໃຈໃສ່ຮັກສາມູນເຊື້ອໜ່ວຍພັກ ປອດໃສ ເຂັ້ມແຂງ ໜັກແໜ້ນຢ່າງຕໍ່ເນື່ອງ.

• < ຕໍ່ໄປ
• ຕໍ່ໄປ >