ຄະນະໂຄສະນາອົບຮົມແຂວງ ຈັດປາຖະກະຖາ 2 ວັນປະຫວັດສາດທີ່ສຳຄັນຂອງພັກ, ຂອງຊາດ ໃຫ້ແກ່ພະນັກງານ-ລັດຖະກອນ ຢູ່ຄະນະໂຄສະນາອົບຮົມແຂວງ

ລາຍລະອຽດ

ສ້າງຂື້ນເມື່ອ ວັນພຸດ, 24 ພຶດສະພາ 2023 04:12

ຂຽນໂດຍ Darling

        ເວລາ 8:30 ໂມງຂອງວັນທີ 17 ພຶດສະພາ 2023 ຄະນະໂຄສະນາອົບຮົມແຂວງ ໄດ້ຈັດປາຖະກະຖາ ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ ຄົບຮອບ 64 ປີ (18/5/1959-18/5/2023) ແລະ ວັນວິລະກຳ ແຫກຄຸກຢ່າງມະຫັດສະຈັນຂອງບັນດາທ່ານຜູ້ນຳພັກ ແລະ ແນວລາວສ້າງຊາດຄົບ 63 ປີ (24/5/1960-24/5/2023)ພາຍໃຕ້ການເຂົ້າຮ່ວມເປັນປະທານຂອງ ທ່ານ ນາງ ຈັນສະໄໝ ວິໄລສານ ຮອງຫົວໜ້າຄະນະໂຄສະນາອົບຮົມແຂວງ, ທ່ານ ເຈັງໄຊ ປອນຍະວົງ ຫົວໜ້າຂະແໜງໂຄສະນາ ປາຖະກາຖາ, ມີພະນັກງານ-ລັດຖະກອນ ຂອງຄະນະໂຄສະນາອົບຮົມແຂວງ ເຂົ້າຮ່ວມທັງໝົດ 21 ທ່ານ, ຍິງ 13 ທ່ານ.

        ໃນພິທີດັ່ງກ່າວ ທ່ານ ນາງ ຈັນສະໄໝ ວິໄລສານ ຮອງຫົວໜ້າຄະນະໂຄສະນາອົບຮົມແຂວງ ໄດ້ເລົ່າຄືນເຫດການປະຫວັດສາດ ການຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ. ຈາກນັ້ນ ທ່ານ ເຈັງໄຊ ປອນຍະວົງ ຫົວໜ້າຂະແໜງໂຄສະນາ ປາຖະກາຖາ ໄດ້ເລົ່າເຖິງວິລະກຳໂຕນຄຸກຢ່າງມະຫັດສະຈັນ ຂອງບັນດາຜູ້ນຳພັກ ແລະ ແນວລາວຮັກຊາດ. ນອກຈາກນີ້ ທ່ານ ເຈັ້ງໄຊ ປອນຍະວົງ ຍັງໄດ້ເນັ້ນໜັກໃຫ້ພະນັກງານ-ລັດຖະກອນພາຍໃນຄະນະໂຄສະນາອົບຮົມແຂວງ ຈົດຈຳຜົນງານການນຳພາອັນສະຫຼາດສ່ອງໃສ, ນ້ຳໃຈຮັກຊາດອັນແຮງກ້າ, ຄວາມສາມັກຄີ ຂອງຜູ້ນຳລາວໃນອາດີດ, ຄວາມຕື່ນຕົວຮັກຊາດຂອງປະຊາຊົນທຸກຊັ້ນຄົນ, ຮຽກຮ້ອງໃຫ້ຄົນຮຸ້ນຫຼັງຈົ່ງນຳເອົາບົດຮຽນຈາກການຕໍ່ສູ້ຂອງບັນພະບຸລຸດ ມາໝູນໃຊ້ໃນຊີວິດຕົວຈິງໃຫ້ເກີດດອກອອກຜົນ, ສ້າງຄວາມສາມັກຄີພາຍໃນ, ບຸກບືນຫ້າວ ຫັນ, ຊອກຮູ້ຮ່ຳຮຽນ ພ້ອມທັງປະຕິບັດວຽກງານທີ່ຕົນຮັບຜິດຊອບໃຫ້ໄດ້ຮັບຜົນສຳເລັດສູງ.

• < ຕໍ່ໄປ
• ຕໍ່ໄປ >