ວັນທີ 18 ມີນາ 2025 ທີ່ສະໂມສອນແຂວງເຊກອງ ຂົງເຂດພັກ-ພະນັກງານ ແລະ ອົງການຈັດຕັ້ງມະຫາຊົນ ໄດ້ຫວນຄືນມູນເຊື້ອ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ (22 ມີນາ 1955-22 ມີນາ 2025) ພາຍໃຕ້ການເປັນປະທານ ຂອງທ່ານ ຖາວອນ ພົມມະໄລລຸນ ອາດີດຄະນະປະຈຳພັກແຂວງ, ອາດີດຮອງເຈົ້າແຂວງເຊກອງ, ມີຫົວໜ້າພະແນກຮອງພະແນກ, ຫົວໜ້າຂະແໜງ, ຮອງຄະແໜງ ພ້ອມດ້ວຍພະນັກງານ-ລັດຖະກອນ ຂອງບັນດາພະແນກການ ທີ່ນອນໃນຂົງເຂດພັກ-ພະນັກງານ ແລະ ອົງການຈັດຕັ້ງມະຫາຊົນເຂົ້າຮ່ວມ.
ໃນພິທີ່ດັ່ງກ່າວຕ່າງໜ້າຄະນະຮັບຜິດຊອບ ເຄື່ອນໄຫວໂຄສະນາ-ປາຖະກະຖາ ວັນສ້າງຕັ້ງພັກປະຊາຊົນລາວ ຄົບຮອບ 70 ປີ ໄດ້ຜ່ານ ແຈ້ງການ ຂອງຄະນະໂຄສະນາອົບຮົມສູນກາງພັກ ສະບັບເລກທີ 1229/ຄອສພ, ລົງວັນທີ 16 ທັນວາ 2024 ກ່ຽວກັບການຈັດຕັ້ງໂຄສະນາ-ປາຖະກະຖາ ວັນສ້າງຕັ້ງພັກປະຊາຊົນລາວ ຄົບຮອບ 70 ປີ ແລະ ຜ່ານຄຳສັ່ງແນະນຳ ຂອງຄະນະປະຈຳພັກແຂວງ ເລກທີ 01/ຄປພຂ, ລົງວັນທີ 20 ກຸມພາ 2025, ວ່າດ້ວຍການກະກຽມສະເຫຼີມສະຫຼອງ 3 ວັນປະຫວັດສາດ.
ໃນໂອກາດນີ້ ທ່ານ ຖາວອນ ພົມມະໄລລຸນ ໄດ້ໃຫ້ກຽດເລົ່າມູນເຊື້ອ ປະຫວັດຄວາມເປັນມາຂອງວັນສຳຄັນດັ່ງກ່າວ ເຊິ່ງທ່ານໄດຍົກໃຫ້ເຫັນເຫດການ ໃນປີ 1973-1975 ເປັນໄລຍະຕໍ່ສູ້ເພື່ອສໍາເລັດການປະຕິວັດຊາດ ປະຊາທິປະໄຕ ໃນທົ່ວປະເທດ ພາຍໃຕ້ການນໍາພາຂອງພັກມະຫາຊົນ, ຊັ້ນຄົນຕ່າງໆຢູ່ໃນເຂດປົກຄອງຂອງສັດຕູ ແລະ ໃນເຂດເປັນກາງເປັນ ຕົ້ນແມ່ນ ກຳມະກອນ, ຊາວນາ, ນັກຮຽນ, ນັກສຶກສາ ໄດ້ພ້ອມກັນລຸກຮື້ຂຶ້ນ ແລະ ເຂົ້າຮ່ວມຂະບວນການຕໍ່ສູ້ນັບມື້ນັບ ຫຼາຍຂຶ້ນ, ຟົດຟື້ນ, ແຂງແຮງ ທົ່ວປະເທດ ໄດ້ປະກາດລົບລ້າງອໍານາດການປົກຄອງ, ອໍານາດທະຫານ ຂອງສັດຕູ ໃຫ້ຊິ້ນເຊີງ; ສ້າງຕັ້ງອໍານາດການປົກຄອງປະຕິວັດ ແລະ ກຳລັງປະກອບອາວຸດປະຕິວັດ ຂອງປະຊາຊົນຂຶ້ນແທນ ໃນຂອບເຂດທົ່ວປະເທດ ໂດຍນໍາໃຊ້ 3 ບາດຄ້ອນຍຸດທະສາດ (ການລຸກຮື້ຂຶ້ນຂອງປະຊາຊົນ, ກໍາລັງປະກອບອາວຸດປະຕິວັດ ແລະ ການລຸກຮື້ຂຶ້ນແຍກຕົວອອກຂອງທະຫານຝ່າຍລາຊະອານາຈັກ ມາຮ່ວມກັບກໍາລັງປະຕິວັດ) ເພື່ອຢຶດອໍານາດແບບ “ບົວບໍ່ຊໍ້າ-ນໍ້າບໍ່ຂຸ່ນ ແຕ່ຈັບປາໄດ້ທັງໝົດ; ປີ 1975 ສູນກາງພັກໄດ້ອອກມະຕິຕົກລົງລົບລ້າງລະບອບລາຊາທິປະໄຕທີ່ຫຼ້າຫຼັງ, ສ້າງຕັ້ງອໍານາດການປົກຄອງໃໝ່ ຂອງປະຊາຊົນທີ່ເຂັ້ມແຂງ ພາຍໃຕ້ການນໍາພາຂອງພັກ ປະຊາທິປະໄຕ ແລະ ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ ປີ 1975 ຢ່າງສະຫງ່າຜ່າເຜີຍ.