ວັນທີ 26 ເມສາ 2024 ທ່ານ ປອ ຄໍາມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງປະທານຜູ້ປະຈໍາການສະພາທິດສະດີສູນກາງພັກ ພ້ອມຄະນະ ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກ ຮ່ວມກັບຄະນະໂຄສະນາອົບຮົມແຂວງ ໂດຍການຕ້ອນຮັບ ຂອງທ່ານ ແສງຄໍາ ສຸວັນແດງ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ ພ້ອມຄະນະ, ມີຄະນະໂຄສະນາອົບຮົມເມືອງລະມາມ ແລະ ພະນັກງານ-ລັດຖະກອນພາຍໃນຄະນະໂຄສະນາອົບຮົມແຂວງ ເຂົ້າຮ່ວມ 22 ທ່ານ, ຍິງ 11 ທ່ານ.
ທ່ານ ບຸນທັນ ແກ້ວມະນີໄລ ຄະນະໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ ໄດ້ລາຍງານຫຍໍ້ ກ່ຽວກັບການເຄື່ອນໄຫວ ວຽກງານໂຄສະນາອົບຮົມໃນໄລຍະຜ່ານມາ ໄດ້ເປັນເຈົ້າການປະຕິບັດພາລະບົດບາດ, ສິດ ແລະ ໜ້າທີ່ ໃນການເປັນເສນາທິການໃຫ້ແກ່ຄະນະພັກ, ອົງການປົກຄອງແຕ່ລະຂັ້ນ, ໄດ້ອອກແຈ້ງການແນະນໍາການເຊື່ອມຊຶມ, ຜັນຂະຫຍາຍແນວທາງຂອງພັກ, ປາຖະກະຖາວັນສຳຄັນ ຂອງພັກ-ຂອງຊາດ ແລະ ສາກົນ ເຖິງຄະນະພັກ, ພະແນກການຂັ້ນແຂວງ, ສອງກຳລັງປະກອບອາວຸດ, ຄະນະໂຄສະນາອົບຮົມ 4 ຕົວເມືອງ, ເປັນເຈົ້າການຄົ້ນຄວ້າ-ປັບປຸງ ດ້ານເນື້ອໃນເອກະສານວັນສຳຄັນຕ່າງໆ ຂອງພັກ-ຂອງຊາດ ເພື່ອໂຄສະນາປາຖະກະຖາມີຜູ້ເຂົ້າຮ່ວມ 10.953 ເທື່ອຄົນ, ຍິງ 4.354 ເທື່ອຄົນ, ສະມາຊິກພັກ 7.903 ເທື່ອສະຫາຍ, ຍິງ 2.914 ເທື່ອຄົນ; ເຜີຍແຜ່ເຊື່ອມຊຶມ, ຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກແຕ່ລະຂັ້ນ, ຄຳສັ່ງ, ກົດລະບຽບພັກ ແລະ ກົດໝາຍ ຂອງລັດ, ມີຜູ້ເຂົ້າຮ່ວມ 2,969 ສະຫາຍ, ຍິງ 497 ສະຫາຍ, ຈັດຝຶກອົບຮົມໃຫ້ພະນັກງານ ລົງກໍ່ສ້າງຮາກຖານການ ເມືອງຢູ່ 4 ຕົວເມືອງ 2 ຄັ້ງ ມີຜູ້ເຂົ້າຮ່ວມ 85 ສະຫາຍ, ຍິງ 18 ສະຫາຍ, ເປີດກອງປະຊຸມວຽກງານການເມືອງ-ແນວຄິດ ທົ່ວແຂວງ ມີຜູ້ເຂົ້າຮ່ວມ 151 ສະຫາຍ, ຍິງ 21 ສະຫາຍ, ຝຶກອົບຮົມໃຫ້ຜູ້ບໍລິຫານໂຮງຮຽນ ແລະ ຄູສອນວິຊາ ການເມືອງ-ສັງຄົມ ຢູ່ອ້ອມຂ້າງແຂວງ, ເມືອງລະມາມ ແລະ ເມືອງທ່າແຕງ ມີຜູ້ເຂົ້າຮ່ວມ 48 ທ່ານ, ຍິງ 48 ທ່ານ, ເກັບກໍາສັງລວມຫາງສຽງສັງຄົມ, ພ້ອມທັງຮ່າງເອກະສານອະທິບາຍຊີ້ແຈງ, ຕອບໂຈດບາງບັນຫາຫາງສຽງສັງຄົມ ທີ່ມີເນື້ອໃນບິດເບືອນຂໍ້ມູນທີ່ບໍ່ສອດ ຄ່ອງ, ສັງລວມການລາຍງານຫາງສຽງຈາກເພື່ອນຮ່ວມງານພະແນກການ ແລະ 4 ຕົວເມືອງ, ຕິດຕາມ ແລະ ເກັບກຳຫາງ ສຽງສັງຄົມ ພ້ອມທັງລາຍງານໃຫ້ຂັ້ນເທິງຮັບຊາບທັນເວລາ, ເອົາໃຈໃສ່ເກັບກໍາ ແລະ ອອກຂ່າວການເຄື່ອນໃຫວ ຂອງຄະນະໂຄສະນອົບຮົມແຂວງ ທາງເວັບໄຊສ ແລະ ເຝສບຸກ ໄດ້ທັນກັບສະພາບການ.
ໃນໂອກາດນີ້ ທ່ານ ປອ ຄໍາມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມ, ຮອງປະທານຜູ້ປະຈໍາການສະພາທິດສະດີສູນກາງພັກ ໄດ້ມີຄຳເຫັນ, ໃຫ້ທິດຊີ້ນຳ ພ້ອມທັງມອບປື້ມ ແລະ ອຸປະກອນຈຳນວນໜຶ່ງ ໃຫ້ຄະນະໂຄສະນາອົບຮົມແຂວງ ເຊິ່ງທ່ານໄດ້ຊົມເຊີຍຕໍ່ຜົນການການຈັດຕັ້ງປະຕິບັດວຽກງານວິຊາສະເພາະ, ກໍຄືການສຶກສາອົບຮົມການ ເມືອງ-ແນວຄິດ, ເຄື່ອນໄຫວຈັດຕັ້ງປາຖະກະຖາ, ເກັບກຳຫາງສຽງສັງຄົມມາປະກອບໃສ່ຮ່າງບົດລາຍງານ ເພື່ອລາຍງານຕໍ່ຂັ້ນເທິງໃນແຕ່ລະໄລຍະ, ພ້ອມນັ້ນທ່ານຍັງໄດ້ເນັ້ນໜັກບັນຫາທີ່ຄະນະໂຄສະນາອົບຮົມແຂວງ ຈະຕ້ອງໄດ້ສຸມໃສ່ໃນຕໍ່ໜ້າຄື: ສຸມໃສ່ເພີ່ມທະວີການສຶກສາອົບຮົມວຽກງານການເມືອງ-ແນວຄິດປ່ຽນໄປສູ່ຄຸນນະພາບໃໝ່, ເປັນເຈົ້າການໃນການຈັດຕັ້ງຜັນຂະຫຍາຍແນວທາງຂອງພັກໃນໄລຍະໃໝ່, ກະກຽມເຜີຍແຜ່, ເຊື່ອມຊຶມເອກສານກອງປະຊຸມໃຫຍ່ 3 ຂັ້ນ ຂອງພັກ ເພື່ອຮັບປະກັນໃນການຈັດຕັ້ງປະຕິບັດ, ດໍາເນີນໃຫ້ຖືກຕ້ອງ, ເປັນເອກະພາບ ແລະ ທັນເວລາ; ສືບຕໍ່ໂຄສະນາເຜີຍແຜ່, ເຊື່ອມຊຶມ, ຜັນຂະຫຍາຍມະຕິກອງປະຊຸມໃຫຍ່ ຂອງອົງຄະນະພັກແຕ່ລະຂັ້ນ ໂດຍຕິດພັນກັບວຽກງານ 3 ສ້າງ, ເພີ່ມທະວີຄວາມສາມັກຄີພາຍໃນກົມກອງ ເພື່ອຮັບປະກັນຜົນສຳເລັດໃນການຈັດຕັ້ງປະຕິບັດວຽກງານຂອງຕົນ.