ຫົວໜ້າກົມໂຄສະນາ ຄະນະໂຄສະນາອົບຮົມສູນກາງພັກ ລົງເຄື່ອນໄຫວວຽກງານ ຢູ່ແຂວງເຊກອງວັນທີ 23-25 ກັນຍາ 2024 ທ່ານ ອານົງສັກ ອິນທະວົງ ຄະນະພັກ ຫົວໜ້າກົມໂຄສະນາ ຄະນະໂຄສະນາອົບຮົມສູນກາງພັກ ພ້ອມຄະນະ ໄດ້ລົງເຄື່ອນໄຫວວຽກງານ ຢູ່ແຂວງເຊກອງ; ໂດຍການຕ້ອນຮັບ ຂອງທ່ານ ບຸນທັນ ແກ້ວມະນີໄລ ຮອງຫົວໜ້າຄະນະໂຄສະນາອົບຮົມແຂວງ ພ້ອມດ້ວຍພະນັກງານ-ລັດຖະກອນ ຂອງຄະນະໂຄສະນາອົບຮົມແຂວງ; ເຊິ່ງການເຄື່ອນໄຫວວຽກງານໃນຄັ້ງນີ້ຈຸດປະສົງແມ່ນ ເຂົ້າພົບ, ສຳພາດ ທ່ານ ເຫລັກໄຫລ ສີວິໄລ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ທ່ານ ເພັງນາ ຈັນທະພອນ ກຳມະການພັກແຂວງ ເລຂາພັກເມືອງ ເຈົ້າເມືອງດາກຈຶງ, ທ່ານ ວົງເດືອນ ຈັນທະບຸດຊຽງ ກຳມະການພັກແຂວງ, ເລຂາພັກເມືອງ, ເຈົ້າເມືອງລະມາມ ເພື່ອເກັບກຳຂໍ້ມູນ ການຜັນຂະຫຍາຍແນວທາງ ແຜນນະໂຍບາຍ ຂອງພັກ ໂດຍສະເພາະແມ່ນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ, ການກະກຽມດຳເນີນກອງປະຊຸມໃຫຍ່ 3 ຂັ້ນ ຂອງພັກ, ບັນຫາທີ່ພົ້ນເດັ່ນ
ພ້ອມທັງ ສຳພາດ ຄອບຄົວຕົວແບບດ້ານການຜະລິດກະສິກຳ (ປູກກາເຟ ເມືອງດາກຈຶງ), ຄອບຄົວຕົວແບບຜະລິດຕະພັນໂອດ໊ອບ (ຫັດຖະກຳຕ່ຳແຜນແບບດັ້ງເດີມ ຂອງຊົນເຜົ່າ ເມືອງລະມາມ) ເພື່ອນຳມາຂຽນລົງຂ່າວທາງວາລະສານໂຄ ສະນາ ແລະ ບົດປະເພດຕ່າງໆ, ໂຄສະນາຜ່ານສື່ ຂອງຄະນະໂຄສະນາອົບຮົມສູນກາງພັກ.