ຕອນເຊົ້າວັນທີ 9 ຕຸລາ 2024 ພະແນກສຶກສາທິການ ແລະ ກິລາ ແຂວງເຊກອງ ຈັດກິດຈະກໍາຍ່າງເພື່ອສຸຂະພາບ ເພື່ອເປັນການສະເຫຼີມສະຫຼອງວັນຄູແຫ່ງຊາດ ຄົບຮອບ 30 ປີ (7 ຕຸລາ 1994-7 ຕຸລາ 2024) ໂດຍມີທ່ານ ເຫລັກໄຫລ ສີວິໄລ ເລຂາພັກແຂວງ-ເຈົ້າແຂວງເຊກອງ, ມີທ່ານຄະນະປະຈໍາພັກແຂວງ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ກອງບັນຊາການ ປກຊ-ປກສ ແຂວງ, ພະນັກງານ-ລັດຖະກອນ, ຄູ-ອາຈານ ແລະ ນັກຮຽນ-ນັກສຶກສາ ເຂົ້າຮ່ວມໃນກິດຈະກຳດັ່ງກ່າວ.
ທ່ານ ຄຳໄພ ສິມມາວັດ ກຳມະການພັກແຂວງ, ຫົວໜ້າພະແນກສຶກສາທິການ ແລະ ກິລາ ກ່າວວ່າ: ເພື່ອສະເຫຼີມສະຫຼອງ ວັນຄູແຫ່ງຊາດຄົບຮອບ 30 ປີ (7 ຕຸລາ 1994-7 ຕຸລາ 2024) ໃຫ້ມີບັນຍາກາດຟົດຟື້ນ ພ້ອມທັງ ເປັນການປູກຈິດສໍານຶກໃຫ້ປະຊາຊົນບັນດາເຜົ່າ ກໍຄືຊາວແຂວງເຊກອງ ໄດ້ເຫັນເຖິງຄວາມໝາຍຄວາມສຳຄັນ ແລະ ຍົກສູງບົດບາດຂອງຄູ-ອາຈານ ທີ່ໄດ້ສະຫຼະເຫື່ອແຮງ ຂອງຕົນປະກອບສ່ວນເຂົ້າໃນການພັດທະນາການສຶກສາ.